អតីតមេធាវីរបស់គ្លីនតុននិងមេធាវីរបស់ពួកតារា ចូលរួមការពារលោកត្រាំទល់នឹងការចោទប្រកាន់ទម្លាក់តំណែង។

Sitharo …

18 Jan 2020

លោកខិនណិត ស្តារ ដែលធ្លាប់ការពារអតីតប្រធានាធិបតី ប៊ីល គ្លីនតុន ក្នុងសវនាការចោទប្រកាន់ទម្លាក់តំណែងកាលពីទសវត្សរ៍១៩៩០ និងមេធាវីអោយពួកតារាល្បីៗរបស់អាមេរិក លោក អាឡាន់ ឌឺសូវីតហ្ស៍ កាលពីថ្ងៃសុក្រទី១៧មករា បានប្រកាសចូលរួមជាមួយក្រុមការពារក្តីរបស់លោកត្រាំ ដើម្បីតតាំងនឹងការចោទប្រកាន់របស់ក្រុមសមាជិកសភាបក្សប្រជាធិបតេយ្យ ថាលោករំលោភអំណាច។

សារព័ត៌មានអាមេរិកបាននិយាយថា លោកស្តារ រដ្ឋអាជ្ញាពិសេសនៅក្នុងរឿងអាស្រូវរបស់គ្លីនតុននៅឆ្នាំ១៩៩៨ បានចូលរួមក្រុមការពារក្តីរបស់លោកត្រាំ។ លោកជាវីរបុរសម្នាក់ចំពោះក្រុមស្តាំ ទោះជាលោកគ្លីនតុនត្រូវព្រឹទ្ធសភាលើកលែងការចោទប្រកាន់។

លោកឌឺសូវីតហ្ស៍ បាននិយាយកាលពីថ្ងៃសុក្រថា លោកនឹងបង្ហាញសេចក្តីថ្លែងការផ្ទាល់មាត់នៅសវនាការព្រឹទ្ធសភា ដើម្បីបង្ហាញការជំទាស់តាមរដ្ឋធម្មនុញ្ញចំពោះការចោទទោសនិងបណ្តេញប្រធានាធិបតី។

អតិថិជនពីមុនៗរបស់លោករួមមានហិរញ្ញិក ជេហ្វហ្វ្រេ អ៊ីបស្ទេន ដែលបានសម្លាប់ខ្លួនឯងនៅបន្ទប់គុកក្នុងក្រុងញូវយ៉ក និងពួកអ្នកមានដទៃទៀត ពាក់ព័ន្ធនឹងការចាប់រំលោភ អ្នកដឹកនាំខ្សែភាពយន្តលោក រ៉ូម៉ាន់ ផូលែនស្គី និងអតីតជើងឯកប្រដាល់ ម៉ៃ ថៃសាន់។

ករណីល្បីល្បាញបំផុតរបស់លោកឌឺសូវីតហ្ស៍ គឺការការពារក្តីដោយជោគជ័យសំរាប់ អតីតកីឡាករបាល់ឱប (បាល់ទាត់អាមេរិក) អូ ជេ ស៊ីមសុន ចំពោះការចោទប្រកាន់សម្លាប់ប្រពន្ធរបស់គាត់និងសាហាយរបស់នាង។

សូមបញ្ជាក់ថា លោកត្រាំ ត្រូវបានសភាចោទប្រកាន់ថារំលោភអំណាចប្រធានាធិបតី ដោយសារតែបានអញ្ជើញនិងបង្ខំបរទេស (អ៊ុយក្រែន) អោយស៊ើបអង្កេតគូប្រជែងនយោបាយមកពីបក្សប្រជាធិបតេយ្យលោកចូ បៃដិន។ លោកក៏ត្រូវបានចោទប្រកាន់ថា រារាំងការងារសភា ដោយសារតែប្រាប់មនុស្សក្រោមបង្គាប់កុំបញ្ចេញឯកសារឬទៅឆ្លើយចំពោះពួកសភាប្រឆាំង។

ទោះជាយ៉ាងណាតែពេលនេះ ក្រុមសេតវិមានដើរចូលក្នុងសវនាការព្រឹទ្ធសភាជាមួយនឹងប្រៀបដោយគណបក្សសាធារណរដ្ឋរបស់ត្រាំមាន៥៣កៅអីក្នុងព្រឹទ្ធសភាដែលមាន១០០កៅអី។

ក្នុងពេលជាមួយគ្នា មេដឹកនាំសម្លេងភាគច្រើនក្នុងព្រឹទ្ធសភា លោក មីត ម៉ាក់ខុនណែល បានបន្ទរការអះអាងរបស់លោកត្រាំដែលថា ការចោទប្រកាន់នេះ ជារឿងនយោបាយ៕